Nua duai in president federal svizzer festivar ils emprims d’avust? S’enclegia en Svizra! Per la festa naziunala da l’onn 1975 era president federal Pierre Graber (1908-2003) dentant a Helsinki. Quel di, ensemen cun 34 auters schefs da stadis u da regenzas, ha’l suttascrit solennamain la decleraziun finala da la Conferenza per la segirezza e collavuraziun en Europa (CscE). Uschia han ils stadis da noss continent, cun l’excepziun da l’Albania, sa garantì vicendaivlamain lur cunfins e l’autodeterminaziun da lur pievels, sco er il respect dals dretgs umans, t. a. la libertad da patratg, conscienza, religiun e persvasiun.
da Guiu e Mechthild Sobiela-Caanitz
La Quotidiana
p. 9